ಮಾತಿನ ಮಹತ್ವ ಸಾರುವ ಸರ್ವಜ್ಞನ ವಚನಗಳು

ಹೊತ್ತಿಗೊದಗಿದೆ ಮಾತು ಸತ್ತವನು ಎದ್ದಂತೆ |

ಹೊತ್ತಾಗಿ ನುಡಿದ ಮಾತು ಕೈಜಾರಿದಾ |

ಮುತ್ತಿನಂತಿಹುದು ಸರ್ವಜ್ಞ ||

ಮಾತಿಂಗೆ ಮಾತುಗಳು | ಓತು ಸಾಸಿರವುಂಟು |

ಮಾತಾಡಿದಂತೆ ನಡೆದರಾ ಕೈಲಾಸ |

ಕಾತನೇ ಒಡೆಯ ಸರ್ವಜ್ಞ ||

ಮಾತಿನಿಂ ನಗೆ-ನುಡಿಯು | ಮಾತಿನಿಂ ಹಗೆ ಕೊಲೆಯು |

ಮಾತಿನಿಂ ಸರ್ವ ಸಂಪದವು ಲೋಕಕ್ಕೆ |

ಮಾತೆ ಮಾಣಿಕವು ಸರ್ವಜ್ಞ ||

ಮಾತು ಬಲ್ಲಾತಂಗೆ | ಮಾತೊಂದು ಮಾಣಿಕವು |

ಮಾತ ತಾನರಿಯದ ಅಧಮಗೆ ಮಾಣಿಕವು |

ತೂತು ಬಿದ್ದಂತೆ ಸರ್ವಜ್ಞ ||

ಮಾತು ಬಲ್ಲಾತಂಗೆ | ಯಾತವದು ಸುರಿದಂತೆ |

ಮಾತಾಡಲರಿಯದಾತಂಗೆ ಬರಿ ಯಾತ |

ನೇತಾಡಿದಂತೆ ಸರ್ವಜ್ಞ ||

ಮಾತು ಮಾಣಿಕ ಮುತ್ತು | ಮಾತೆ ತಾ ಸದನವು |

ಮಾತಾಡಿದಂತೆ ನಡೆದಾತ ಜಗವನ್ನು|

ಕೂತಲ್ಲಿ ಆಳ್ವ ಸರ್ವಜ್ಞ ||

    

ಮಾತು ಮಾತಿಗೆ ತಕ್ಕ | ಮಾತು ಕೋಟಿಗಳುಂಟು |

ಮಾತಾಡಿ ಮನಕೆ ಮುನಿಸಕ್ಕು ಮಾತಿನಲಿ |

ಸೋತವನೆ ಜಾಣ ಸರ್ವಜ್ಞ ||

    

ರಸಿಕನಾಡಿದ ಮಾತು | ಶಶಿಯುದಿಸಿ ಬಂದಂತೆ |

ರಸಿಕನಲ್ಲದನ ಬರಿಮಾತು ಕಿವಿಯೊಳ್ಕೂರ್ದಸಿಯು|

ಬಡಿದಂತೆ ಸರ್ವಜ್ಞ ||

       

ಕಾದ ಕಬ್ಬುನವು ತಾ | ಹೊಯ್ದೊಡನೆ ಕೂಡುವದು |

ಹೋದಲ್ಲಿ ಮಾತು ಮರೆದರಾ ಕಬ್ಬುನವು |

ಕಾದಾರಿದಂತೆ ಸರ್ವಜ್ಞ ||