ನುಡಿ ನಮನ

ಬದುಕ ಬಯಸಿ ಬವಣೆಯ ಬಂಡಿಯೇರಿ

ಬದುಕಿನುದ್ದಕ್ಕೂ ಕಷ್ಟ ನಷ್ಟವನೇ ಕಂಡುಂಡು

ಬದುಕ ಬವಣೆ ಜಯಿಸಿದಾಕೆ

ಬಯಸಿದುದ ಪಡೆಯಲಾಗದೆ ತವಕಿಸುತ

ಸತ್ತು ಸತ್ತು ಬದುಕದೂಡಿ ಸತ್ತು ಬದುಕಿದಾಕೆ

ತನು ಮನ ಧನವ ಅನ್ಯರ ಸುಖಕೆ ಮೀಸಲಿಟ್ಟು

ಸಂಕಷ್ಟದ ಪರಂಪರೆಯನೇ ನಿರಂತರವು ಎದುರಿಸಿ

ಕಷ್ಟ ನಷ್ಟಗಳಿಗೆ ಎದೆಗುಂದದೆ

ಕನಸು ಮನಸಿನಲ್ಲೂ ಕೇಡೆಣಿಸದೆ

ನೋವಿನಲ್ಲೂ ನಲಿವಕಂಡು

ನಗುನಗುತ ಎಲ್ಲರೊಡನೆ ಕೂಡಿ ಬಾಳಬಯಸಿದಾಕೆ

ಎಲ್ಲರಂತೆ ಬದುಕ ಬಯಸಿ

ಬವಣೆಪಟ್ಟು ಹಸುವಕಟ್ಟಿ ಹಾಲುಕರೆದು 

ಹಣಗಳಿಸಿ ದೇಹದಣಿಸಿ

ಅನ್ಯರ ಸುಖದಲಿ ತನ್ನ ಸುಖವಕಂಡು

ನೋವು ಅವಮಾನಗಳನು ಸಹಿಸಿ

ಅಕ್ಕರೆಯ ಸಕ್ಕರೆಯ ನುಡಿಗಳನೇ ನುಡಿದು

ಎಲ್ಲರಾ ಸುಖ ದುಃಖಗಳಲಿ ಭಾಗಿಯಾಗಿ ಬಾಳಿದಾಕೆ

ಪತಿ ಪರ ದೈವವೆಂದೆಣಿಸಿ

ಮಕ್ಕಳೆನ್ನ ಸರ್ವಸ್ವವೆಂದೆಣಿಸಿ

ಬಂದು ಮಿತ್ರರೆಲ್ಲ ನನ್ನವರೆಂದೆಣಿಸಿ

ಎಲ್ಲರಿಂಗಿತಕೆ ಅನುಗುಣವಾಗಿ

ಬದುಕು ಸವೆಸಿ ಬಾಳಿದಾಕೆ

ನೋವು, ದುಃಖ, ದುಮ್ಮಾನ

ಕಷ್ಟ, ಕಾರ್ಪಣ್ಯ, ಅಪಮಾನ

ಅಪಹಾಸ್ಯಗಳ ನಡುವೆಯೇ

ಬದುಕ ಬಂಡಿಯೆಳೆದು ಬಾಳಿದಾಕೆ

ನೆಮ್ಮದಿಯ ಬಾಳ ಬಯಸಿ

ಸುಖಜೀವನವನರಸಿ

ಭವಿಷ್ಯದಲಿ ಭರವಸೆಯನಿರಿಸಿ

ನಿರಂತರವು ನಿರೀಕ್ಷಣೆಯಲೆ ಬದುಕಿದಾಕೆ

ಹಬ್ಬ ಹರಿದಿನಗಳನಾಚರಿಸಿ

ವ್ರತ ಕಥಾದಿಗಳ ಬಿಡದೆ ಮಾಡಿ

ನೀತಿ ನಿಯಮವ ಹೇಳಿ

ಶುಚಿ ರುಚಿಯ ಖಾದ್ಯವಮಾಡಿ

ಕೊಡುಗೈಯ ದಾನಿಯಾಗಿ

ನಿಸ್ವಾರ್ಥದಿಂ ಎಲ್ಲರಾ ಸೇವೆಯ ಮಾಡಿ

ಸೂಕ್ಷ್ಮಾತಿ ಸೂಕ್ಷ್ಮ ಮನ ದೇಹವ ಹೊಂದಿ

ಕಾಠಿಣ್ಯಾತಿಕಾಠಿಣ್ಯ ಪರಿಸರದಿ ಬಾಳಿ ಬದುಕಿ ಜಯಿಸಿದಾಕೆ

ಧಾರಾಳಿಯಾಗಿ ಧಂದ್ರಾಳಿಯೆನಿಸಿ

ಮನೆಮನಗಳನುಳಿಸೆ ಶ್ರಮಿಸಿ

ಎಲ್ಲರ ಸಮಸ್ಯೆಗಳಿಗೆ ತಾನೇ ಪರಿಹಾರವಾಗಿ

ತನ್ನ ಸಮಸ್ಯೆಗಳಿಗೆ ಪರಿಹಾರ ಕಾಣದಂತಾಗಿ

ಸಮಸ್ಯೆಗಳ ಸುಳಿಗೆ ಸಿಲುಕಿ ನಲುಗಿದಾಕೆ

ಬಾಳಿನಲಿ ಮರಿಚಿಕೆಯಾದ ಸುಖ ಶಾಂತಿ ನೆಮ್ಮದಿಯ

ಆ ಭಗವಂತ ಇನ್ನಾದರೂ ಕರುಣಿಸಲಿ

ಚಿರನಿದ್ರೆಯಲ್ಲಿ ಚಿರಶಾಂತಿ ಲಭಿಸಲಿ

ಅವಳಾತ್ಮಕೆ ಮುಕ್ತಿಯ ಕರುಣಿಸೆಂದು

ಆ ದೈವವ ಎಲ್ಲರೊಂದಾಗಿ ಪ್ರಾರ್ಥಿಸುವ.

******** * ********