ಎಲ್ಲಿಂದ ಬಂತು

ಹಣ್ಣು ಹೂವು ತಳಿರು ನೆರಳನೀವ ವೃಕ್ಷಕ್ಕಿಲ್ಲಿನಿತು ಸ್ವಾರ್ಥ

ಹರಿವ ನೀರು ಬೀಸುವ ಗಾಳಿ ಪೊರೆವ ಭೂಮಾತೆಗಿಲ್ಲಿನಿತು ಸ್ವಾರ್ಥ

ಹಗಲ ತರಣಿ ಇರುಳ ತಾರೆ ಸುಧಾಕರರಿಗಿಲ್ಲಿನಿತು ಸ್ವಾರ್ಥ

ಹಲವು ಬಗೆಬಗೆಯ ಸ್ವಾರ್ಥ ನರನಿಗೆಲ್ಲಿಂದ ಬಂತು ನನ ಕಂದ||

ಚೆಲುವಾಗಿಸು ಜೀವನವ

ಗುರಿಯೊಡನೆ ಗುರುವಾಶ್ರಯವ ಪಡೆದು

ಗುರಿ ಬಿಡದೆ ಸಾಗುತಿರು ಛಲದೊಡನೆ

ಗುರು ಬೆಂಬಲವ ಪಡೆದು ಗುರಿಮುಟ್ಟು

ಚೆಲುವಾಗಿಸು ಜೀವನವ – ನನಕಂದ||

ಒಳಿತ ನೀ ಕಾಣು

ಹಳತೆಂದು ಹಳಿಯದಿರು ಹೊಸತೆಂದು ಹೊಗಳದಿರು
ಹಳೆಯದಿಲ್ಲದಿರೆ ಹೊಸದದಕೆ ಬೆಲೆಯೆಲ್ಲಿಯದು
ಹಳೆಯದರನುಭವದಿಂದಲೆ ಹೊಸದು ಬಂದಿಹುದು
ಹಳತು ಹೊಸತರೊಳೊಳಿತ ನೀ ಕಾಣು ನನಕಂದ||

ನಮ್ಮೆಲ್ಲರ ಸಂತಸ

ಅರವಿಂದಲೋಚನ ಅಂಗಳದಿ ಆಡಿದ

ಆಗಸದ ಚಂದಿರ ಬೇಕೆಂದು ಬಯಸಿದ

ಮುಕುರದಲಿ ಬಿಂಬವ ಕಂಡು ಸಂಭ್ರಮಿಸಿದ

ನಮ್ಮೆಲ್ಲ ಸಂತಸವು ಅಂತೆ ನನಕಂದ||