ಅಬ್ದುಲ್ ಕಲಾಂ ಸಹಸ್ರ ಸಲಾಂ

ಬಡತನದ ಬೇಗೆಯಲಿ ತಾ ಬೆಂದು

ಬಡತನದ ಕಷ್ಟ ಸುಖವನುಂಡು

ಬಡತನವ ಸ್ಥೈರ್ಯದಲಿ ಮೆಟ್ಟಿನಿಂದು

ಬಡತನವ ಬಡಿದೋಡಿಸುತ ಬೆಳೆದು

ಸಿರಿ ಸೊಬಗ ಕಂಡು ಶಿಸ್ತಿನಲಿ ಬಾಳಿದಾತ

ವೃತ್ತ ಪತ್ರಿಕೆಯನು ಹಂಚಿ ಬೆಳೆದು

ವೃತ್ತ ಪತ್ರಿಕೆಯ ತುಂಬೆಲ್ಲಾ ತಾನೆ

ಸುದ್ದಿಯಾಗಿ ಜನ ಮನದಲಿ ನೆಲೆಸಿದಾತ

ಕನಸುಗಳ ಹೆಣೆದು  ಕನಸುಗಳ ಹೊತ್ತು

ಕನಸಗಳ ನನಸಾಗಿಸುವ ಪಥದಿ ಸಾಗಿ

ಕರ್ಮಯೋಗಿಯಂತೆ ಕಾರ್ಯವೆಸಗಿ

ಕಾಯಕ ತತ್ವಕೆ ಸದಾ ತಾ ಬದ್ಧನಾಗಿ

ಕಾಯಕದಲೇ ಕೊನೆಯುಸಿರನೆಳೆದಾತ

ಇಳಿಯ ವಯಸಿನಲೂ ತರುಣನಂತೆ ಮಿಂಚಿ

ಭವಿಷ್ಯದ ಭರವಸೆಯಲೇ ಬದುಕ ಕಟ್ಟಿ

ತರುಣರಿಗೆ ದಾರಿದೀಪವಾಗಿ ದಾರಿ ತೋರಿ

ಮಕ್ಕಳೊಡನೆಕೂಡಿ ಮಗುವೇ ತಾನಾಗಿ

ಕನಸ ಬಿತ್ತಿ ನನಸಾಗಿಸುವ ದಾರಿ ತೋರಿದಾತ

ಗುಡಿಸಿಲಿನಿಂದ ರಾಷ್ಟ್ರಪತಿ ಭವನದೆಡೆಗೆ

ದಾಪುಗಾಲು ಹಾಕಿ ಸನ್ನ್ಮಾರ್ಗದಲಿ ಸಾಗಿ

ಅನನ್ಯ ಸಾಧನೆಗಳ ಸರದಾರ ತಾನಾಗಿ

ಸಜ್ಜನಿಕೆಯ ಸಾಕಾರ ಮೂರುತಿಯೆನಿಸಿದಾತ

ವಾಮನನಂತೆ ತಾನಿದ್ದು, ತ್ರಿವಿಕ್ರಮನಂತೆ ಬೆಳೆದು

ವಿದ್ಯಾರ್ಥಿಯಂತೆ ಇದ್ದು, ಶಿಕ್ಷಕರಿಗೆಲ್ಲಾ ಶಿಕ್ಷಕನಾಗಿ

ಕಲಿಸುತ  ಕಲಿಯುತ ಸಾಗಿ, ಜ್ಞಾನದ ಹರವ ವಿಸ್ತರಿಸುತ

ಜ್ಞಾನ ವಿಜ್ಞಾನವ ಬೆಳೆಸುತ, ಕ್ಷಿಪಣಿ ಮಾನವನೇ ಆದಾತ

ಯುಗ ಪುರುಷ, ದಾರ್ಶನಿಕ ಪ್ರಖ್ಯಾತ ಸಾಹಿತಿ

ಶ್ರೇಷ್ಠ ಸಂತ, ಸಂಗೀತ ಪ್ರಿಯ, ಕಲಾ ರಸಿಕ

ಭಾರತಾಂಬೆಯ ಸುಪುತ್ರನಾಗಿ

ಭಾರತದ ಪ್ರಥಮ ಪ್ರಜೆ ತಾನಾಗಿ

ದೇಶ ರಕ್ಷಣೆಯ ಬಲಗೊಳಿಸಿ

ಅನ್ಯ ದೇಶಗಳ ಬೆಚ್ಚಿ ಬೀಳಿಸಿ

ಹಮ್ಮಿನಲಿ ಬೀಗುತ್ತಿದ್ದ ದೇಶಗಳ

ಕನಸುಗಳ ಭಗ್ನಗೊಳಿಸಿ ನಿದ್ದೆಗೆಡಿಸಿ

ತನ್ನ ದೇಶದ ಭವಿಷ್ಯದ ಕನಸ ಕಂಡು

ನನಸಾಗಿಸುವ ತರುಣರ ಪಡೆಯ ಬೆಳೆಸಿದಾತ

ಅವರ ನುಡಿಮುತ್ತುಗಳೆಮಗೆ ದಾರಿ ದೀಪ

ಅವರ ನಡೆ ಯುವಕರಿಗೆ ಸ್ಫೂರ್ತಿಯ ಸೆಲೆ

ನಿಜ ಅರ್ಥದಲಿ ಜಗದ ಸರ್ವರ ಗುರುವಾತ
ಗುರು ಸ್ಮರಣೆಗೆ ಶ್ರೇಷ್ಠವೆನಿಸಿದ  ಗುರು ಪೂರ್ಣಿಮೆಯ ದಿನವಾದ ಇಂದು ಸದ್ಗುರುವೇ ಆಗಿರುವ ಕಲಾಂರವರಿಗೆ  ಹೃದಯಾಂತರಾಳದಿಂದ ನಮಿಸೋಣ. ಕಲಾಂರನ್ನು ಕುರಿತ ಚಟುವಟಿಕೆಯನ್ನು ವಿದ್ಯಾರ್ಥಿಗಳಿಗೆ ನೀಡೋಣ.