ಸರಿಪಡಿಸಿಕೊ ನಿನ್ನ ತಪ್ಪುಗಳ

ಸರಿಯಿಲ್ಲವ ಸರಿಯಿಲ್ಲವೇಯಿಲ್ಲವರೆನದಿರು

ಸರಿತಪ್ಪಿನ ಎಣಿಕೆಯಲೇ ಕಾಲ ಕಳೆಯದಿರು

ಸರಿಸಿ ಸುಖದ ಕ್ಷಣವ ಕ್ಷಣಕ್ಷಣವು ನರಳದಿರು

ಸರಿಪಡಿಸಿಕೊ ನಿನ್ನೆಲ್ಲ ತಪ್ಪುಗಳ ನನಕಂದ||

ಪಾತ್ರಧಾರರು

ಸೃಷ್ಟಿ ಕರ್ತನ ಸೃಷ್ಟಿಯಲಿ ರೂಪುತಳೆದಿಹ ಪಾತ್ರಗಳು 

ವಿಧಿಯ ನಿರ್ದೇಶನದಿ ಎಲ್ಲಾ ತಾಲೀಮು ನಡೆಸುತಿಹೆವು 

ಜಗದ ಜಗುಲಿಯೇ ರಂಗಭೂಮಿಯಾಗಿ ಸಜ್ಜಾಗಿಹುದು

ನಿರ್ವಹಿಸು ಎಚ್ಚರದಿ ನಿನ್ನ ಪಾತ್ರಗಳ - ನನ ಕಂದ ||

ವರ್ಷಕಾಲದ ಹರ್ಷ

ವರ್ಷವೈದರವರಗಕ್ಕರೆಯ ಸಕ್ಕರೆಯ ನುಡಿಗಳಿಂ ರಮಿಸು

ವರ್ಷ ಹದಿನೈದರವರಗೆ ಶಿಸ್ತಿನಲಿ ತಪ್ಪತಿದ್ದಿ ಬುದ್ದಿಕಲಿಸು

ವರ್ಷ ಹದಿನಾರುದಾಟೆ ಮಿತ್ರನಂದದಿ ಒಲವಿನಲಾದರಿಸು

ವರ್ಷಕಾಲದ ಹರ್ಷ ಮಕ್ಕಳೊಡನಾಗ ನಿನಗೆ ನನ ಕಂದ||                                                        

ಇತಿ ಮಿತಿ

ಇದೆಯಿತಿಮಿತಿಗಳೆಲ್ಲರೊಳೆಲ್ಲದರೊಳು

ಇದನರಿತು ನಡದರದುವೆ ಜಯದ ಹಾದಿ

ಇದನರಿಯದೊಡೆ ಕಾರ್ಪಣ್ಯ ಬಿಡದಲಾ

ಇದನೇ ಸಾರುತಿದೆ ಸೃಷ್ಟಿ ನನ ಕಂದ||

ಮನಸ್ಸು ಮುಗ್ದ

ಮನಸ್ಸೆಂಬುದು ಮುಗ್ದಶಿಶುವಿನವೊಲ್
ಮನದೊಡೆಯ ಬೆಳೆಸಿದವೊಲ್  ಬೆಳೆವುದು  
ಮನಸ್ಸಿನೊಡಯ ನೀನೆಂಬರಿವಿರಲಿ   
ಮನವನೆಚ್ಚರದಿ ನಡೆಸು-ನನ ಕಂದ||

ಅಂದು ಇಂದು

ಮಮತೆಯ ಬೀಜವ ಬಿತ್ತಿ

ನಿಸ್ವಾರ್ಥದ ಕಟ್ಟೆಯ ಕಟ್ಟಿ

ಪ್ರೀತಿ ವಿಶ್ವಾಸದ ನೀರನೆರದು

ಸಹಕಾರ ಸಹಾನುಭೂತಿ ಗೊಬ್ಬರವ ಹಾಕಿ

ಅಕ್ಕರೆಯ ಸಕ್ಕರೆಯ ಸವಿ ಫಲವನೀಡುವ

ಬೃಹತ್ ವೃಕ್ಷಗಳ ಬೆಳೆದರು ನಮ್ಮ ಪೂರ್ವಿಕರು

ನಿಷ್ಕಾಮನೆಯ ಫಲವನುಂಡು

ವಸುಧೈವಕುಟುಂಬಕಂ ಎಂದು

ಎಲ್ಲರೊಂದಾಗಿ ಸಹಬಾಳ್ವೆಯಿಂದ

ಶಾಶ್ವತ ಕಾರ್ಯವ ಮಾಡ ಬಯಸಿದರು

ಮುಂದಿನವರ ಬಾಳ ಹಸನುಗೊಳಿಸುತ

ಸಾರ್ಥಕ ಬದುಕ ಬದುಕಿ ತೋರಿಸಿದರು

ಪ್ರೇಮಸೌಧ ತಾಜಮಹಲ್

ಆಡಳಿತಕೇಂದ್ರ ವಿಧಾನ ಸೌಧ

ಕಲೆಯ ಬೀಡು ಬೇಲೂರು ಹಳೆಬೀಡು

ಸಸ್ಯಕಾಶಿಯೇ ಆಗಿಹ ಲಾಲ್ ಬಾಗ್

ಜೀವಜಲಕಾಸರೆ ಕೆರೆ ಕಟ್ಟೆ ಕೊಳ ಬಾವಿಗಳು

ಜೀವನ ಚೈತನ್ಯ ಕನ್ನಂಬಾಡಿಯ ಕಟ್ಟಿದರು

ಪ್ರಕೃತಿಯಾರಾಧಕರಾಗಿ ಸುಖಿಸಿ

ದೈವವನ ನಾಗವನವ ಉಳಿಸಿ

ಕಾಡು ಉಳಿಸಿ ನಾಡ ಬೆಳೆಸಿ

ತೋಪು ತೋಟ ಗದ್ದೆ ಹೊಲದಿ ಶ್ರಮಿಸಿ

ಕಾಯಕವೇ ಕೈಲಾಸವೆಂದು ಸಂಭ್ರಮಿಸಿ

ಬದುಕ ಉಳಿಸಿ ಬೆಳೆಸÀಲು ಶ್ರಮಿಸಿದರು ಅಂದು 

ವಿಷದ ಬೀಜವ ಬಿತ್ತಿ

ಸ್ವಾರ್ಥತದ ಕಟ್ಟೆಯನೇ ಕಟ್ಟಿ

ಕಾಮ ಕ್ರೋದದ ನೀರನೆರೆದು

ಮದ ಮತ್ಸರದ ಗೊಬ್ಬರವ ಹಾಕಿ

ದ್ವೇಷ ಅಸೂಯೆಯ ಫಲವನೀವ

ಬೃಹತ್ ವೃಕ್ಷಗಳ ಬೆಳೆಸಿಹರು ಇಂದಿನವರು

ಕಾಮನೆಯ ಫಲವನುಂಡು

ಜಗದ ಸೊಬಗು ತನಗೇ ಎಂದು

ತಾನು ತÀನ್ನ ಕಣ್ಣಬೊಂಬೆ ಮಾತ್ರವೆಂದು

ಕ್ಷಣಿಕ ಸುಖದ ಸೊಗಕೆ ಮಾರು ಹೋಗಿ

ತನ್ನವರ ದೂರಸರಿಸಿ ಒಂಟಿ ಬಾಳ ಬಯಸಿ

ನೋವಿನ ಬದುಕ ಬದುಕೆ ಮುನ್ನುಗ್ಗುತಿಹರು

ಹೊಂಡ ಗುಂಡಿಗಳಾಗಿಹ ರಸ್ತೆ

ಕಸದ ಆಗರವೇ ಆಗಿಹ ನಗರ

ಕಣ್ಮರೆಯಾಗುತಿಹ ಕೆರೆ ಗದ್ದೆ ತೋಟ

ತಲೆಎತ್ತಿ ನಿಂತಹ ಗಗನ ಚುಂಬಿಕಟ್ಟಡ

ತಿನ್ನುವನ್ನಕೆ ಸಂಚುಕಾರವಾಗಿಹ ಬಾಳು

ಅಪರಿಚಿತ ಅಪನಂಬಿಕೆಯ ಬದುಕು

ಕುಲಾಂತರಿ ತಳಿಗಳ ಮೇಲಾಟ

ಭಯೋತ್ಪಾದಕರ ಅಟ್ಟಹಾಸದಾಟ

ಬರಡಾಗಿಸುತಿಹ ಭ್ರಷ್ಟರಾ ಕೂಟ

ಲಂಚಕೋರರಾ ಸ್ವಾರ್ಥದಾಟ

ಭದ್ರತೆಯ ಕಾಣದ ಭೀತಿಯಾಟ

ಸುಖ ಬಾಳ ನೆಲಸಮವಾಗಿಸುವಾಟ

ದುಡಿಮೆಯ ಬೆನ್ನಹತ್ತಿಹ ಬರಿ ಒತ್ತಡದ ಬದುಕು

ಎಲ್ಲವಿದ್ದೂ ಏನೂ ಇಲ್ಲದ ನವನವೀನ ಬದುಕು 

ಸುಖವೆಂದು ಭ್ರಮಿಸುತ್ತಿರುವ ವೀಕೆಂಡ್ ಬದುಕು

ಅಹಂಮಿನ ಹಮ್ಮಿನಲಿ ಕಳೆದು ಹೋಗಿಹ ಬದುಕು

ಮಿತಿಯಿಲ್ಲದೆ ಬೆಳೆಯುತಿಹ ವೃದ್ಧಾಶ್ರಮದ ಬದುಕು

ಮುಂದಿನಾ ಬದುಕ ಬರಿದಾಗಿಸುತ್ತಿಹರು ಇಂದು

ಕಾಟದಾಟ

ಬೆಳೆಗೆ ಕಂಟಕವಾಗಿಹ ಕುಲಾಂತರಿ ತಳಿಗಳ ಕಾಟ
ಭ್ರಷ್ಟರಾ ಕೂಟ ಲಂಚಕೋರರಾ ಕೊನೆಯಿಲ್ಲದಾಟ
ಭಯೋತ್ಪಾದಕರ ಕೊನೆಯಿಲ್ಲದಟ್ಟಹಾಸದ ಕಾಟ
ಬಾಳ ಸುಖವ ನೆಲಸಮವಾಗಿಸುವಾಟ-ನನ ಕಂದ