ಇಂದಿವಳೆ ಮುಂದು

ಕೈಗಳಲಿ ಬಳೆಗಳ ಸದ್ದಿಲ್ಲ, ಹಣೆಯಲಿ ಕುಂಕುಮವಿಲ್ಲ

ಕೊರಳಲಿ ಮಾಂಗಲ್ಯ ಸರವಿಲ್ಲ, ಸೊಂಟದಲಿ ಡಾಬಿಲ್ಲ

ಪಿಲ್ಲೆ, ಕಾಲುಂಗುರಗಳಿಲ್ಲ, ಗೆಜ್ಜೆಯ ಝಣ ಝಣನಾದವಿಲ್ಲ

ಮೂಗುತಿ, ಬೆಂಡೋಲೆಗಳನೆಂದೂ ಹಾಕಿಯೇ ಇಲ್ಲ

ಸೀರೆಯುಟ್ಟವಳಲ್ಲ, ಕುಪ್ಪಸವ ತೊಟ್ಟವಳೂ ಅಲ್ಲ

ಜೀನ್ಸ್, ಪ್ಯಾಂಟ್, ಟಿ ಶರ್ಟ್ , ಮಿಡಿ, ಟಾಪು, ಹೈಹೀಲ್ಡು, ಗಾಗಲ್ಸ್, ವ್ಯಾನಿಟಿ ಬ್ಯಾಗ್, ಮೊಬೈಲ್, ಬಿಡುವುದಿಲ್ಲ

ಜಡೆಯನೆಂದೂ ಹೆಣೆದೇ ಗೊತ್ತಿಲ್ಲ ಹೂಮುಡಿವುದೆಲ್ಲಿಂದ

ಕೂದಲ ಹಾರಾಡುತ್ತಿಹುದು ಹಿಂದೆ ಮುಂದೆ ಸ್ವಚ್ಛಂದದಿಂದ

ಗೌರಮ್ಮನಂತಹ ಗಾಂಭೀರ್ಯ ಸುಳಿವುದಿನ್ನೆಲ್ಲಿಂದ

ಆದರೂ ಘನತೆ ಗೌರವಗಳಿಗೆ ಕಿಂಚಿತ್ತು ಧಕ್ಕೆ ಬಂದೇ ಇಲ್ಲ

ಲ್ಯಾಪ್ ಟ್ಯಾಪ್ ಮುಂದೆ ಕುಳಿತು ಸದಾ ಕೆಲಸಮಾಡುತಿಹಳಲ್ಲ

ಯಾರಿಗೂ, ಯಾವುದಕೂ ಎಂದೆಂದೂ ಹೆದರುವುದಿಲ್ಲ

ನಾಲ್ಕು ಗೋಡೆಗಳ ನಡುವಿನ ಜೀವನಕೆ ಬಂದಿಯಾಗಿಲ್ಲ

ಯಾವ ಕೆಲಸ ಕಾರ್ಯಗಳಿಗೂ ಹಿಂದೆ ಮುಂದೆನೋಡುವುದಿಲ್ಲ

ಅಂಜದೇ ಅಳುಕದೇ ಮುನ್ನುಗ್ಗಿ ಸಾಧನೆಗಳಮಾಡುತಿಹಳಲ್ಲ

ವೇಷ ಭೂಷಣಗಳಿಂದಲ್ಲ ಸಾಧನೆಯೆಂದುತೋರುತಿಹಳಲ್ಲ

ಎಲ್ಲ ಕ್ಷೇತ್ರಗಳಲೂ, ಎಲ್ಲ ವಿಚಾರಗಳಲೂ ಇಂದಿವಳೆಮುಂದಿಹಳಲ್ಲ.

ಅಹಲ್ಯ, ದ್ರೌಪತಿ, ತಾರಾ, ಮಂಡೋದರಿ, ಸೀತಾ, ಸರಸ್ವತಿ,ಲಕ್ಷ್ಮೀ, ಪಾರ್ವತಿ, ಸಾವಿತ್ರಿ, ಗಾಯಿತ್ರಿ, ಉಮೆ, ರಮೆ, ಚಂಡಿ, ಚಾಮುಂಡಿ,ಕಾಳಿ, ದುರ್ಗಿ, ಗಾರ್ಗಿ….

ಎಲ್ಲರೂ ತಾನಾಗಿ ಸಾಧನೆಯ ಪಥದಲಿ ಸಾಗುತ ಇಂದಿವಳೆ ಮುಂದಿಹಳಲಾ…..!
ಇಂದಿನ ಇವಳೆ ಮುಂದಿನವಳೆಲ್ಲ.